22 juillet 2011

الحرشة بدانون

الحرشة بدانون


المقادير

450جرام سميدة رقيقة
1دانون فاني أو بدون نكهات
مسوس أو حلو ، ماشي مشكل
1خمارة ألزا
كاس صغير ديال الزيت
4 /1 لتر ديال الما
شوية ديال الملحة
 


أول شي كيف العادة كند يرو الخمارة و الملحة و الزيت على السميدة ونفركوها بأطراف الأصابع حتى تولي كلها مزيتة ، و تتخلط مزيان ، كنطلقو دانون فالما لي عندنا باش ما يكورش لينا السميدة يلا درناه عليها مباشرة ، ثم كنكبو الخليط و نخلطو برؤوس الأصابع بلا دليك بلا مجهود
، كنلاحظوا أنها جارية شوية ، ولكن معليش ، السميدة معروفة كتشرب دغيا


فهاد الأثناء كتكون المقلة كتسخن على النار ، كناخدو معلقة ديال الزيت و ندهنوا بيها المقلة من بعد ما سخنت ، من القاع و الجوانب ،
عنداكو تحرقوا إيديكم ، دهنوا بالشيتة طبعا

ثم كنرشو فيها شوية ديال السميدة ، كتلاحظوا أنها كتبان كتغلي فالزيت حيت سخونة المقلة


كنكبوا الخليط ديالنا كيف ما هو و كنمشيوه بإيدينا بسرعة بعد ما نفزكوهم بشوية ديال الما ، حتى تولي الحرشة مبسطة فالمقلة كلها 



كناخدو شوية ديال السميدة ونرشوها على الوجه عاوتاني و نقرصوها باش تشد فالعجينة مع مراعاة تنسيق شكلها ، و كنخليوها تطيب على عافية متوسطة ، ومن بعد كنقلبوها تطيب على الجهة الأخرى و تقدم ساخنة

هذي الحرشة الثانية ، نفس الطريقة و المقادير ولكن درت الزبدة مذوبة عوض الزيت ، وجات غزالة وبنينة و هشيشة أحسن من الأولى

 

2 commentaires: